Amaqula amabandla akuhulumende womanyano asevumelene ukuthi izisebenzi eziphiwa imali zingaqatshwanga okusemthethweni lamagama angela banikazi aholiswayo, amaghost workers kumele asuswe ngesiphangiphangi kuluhlu lweholo lezisebenzi zikahulumende. Abantu laba lamagama la abikwa esedlula inkulungwane ezingamakhulu ayisikhombisa-75 000. Lokhu kutsho ukuthi uhulumende uzalondoloza imali edlula izigidi ezingamatshumi amabili. Inengi lezisebenzi lezi ezingaqatshwanga okusemthethweni zibikwa kuyintsha yeZanu PF.
Lokhu kuza ngesikhathi uhulumende esithi kalamali yokwengezelela iholo lezisebenzi zakhe. Umsekeli kanobhala oqoqa inhlelo zebandla leMDC elikhokhelwa nguMnu. Morgan Tsvangirai, uMnu. Abednico Bhebhe utshele iStudio 7 ukuthi uhulumende useqalisile ukuloba uluhlu lwamagama lenombolo zesithupha zezisebenzi lezi okungaletha imali yokwengezelela izisebenzi.