Ugatsha olukhokhela uhlelo lokuxolelana elizweni olweOrgan on National Healing and Reconciliation luqhube umhlangano labameli beZanu PF labamacele womabili eMDC ngoLwesithathu eHarare kuhlafunwa udaba lodlakela.
Abebandla leMDC babikwa bekhonone kakhulu ngodaba lokuthi amapholisa, amasotsha labosiko bakhanya bengenela kwezombusazwe besekela ibandla leZanu PF.
Lelibandla libikwa likhonone njalo ngengoma zebandla leZanu PF ezitshaywa emsakazweni weZBC kulezinsuku, isithi zikhuthaza ukungezwani elizweni.
Kube lokuvumelana phakathi kweZanu PF leMDC ekuthini amabandla la kumele esebenze gadalala ekhuthaze ukuthula lokuxolelana.
Isikhulumi seMDC ekhokhelwa nguMnu Morgan Tsvangirai uMnu Nelson Chamisa uthi bajabule kakhulu ngempumela yomhlangano lo, okungamazwi agcizelelwe yisiphathamandla seZanu PF uMnu Dydimus Mutasa labeMDC ekhokhelwa nguMnu Arthur Mutambara.
Ukuhlaziya udaba lolu uNtungamili Nkomo oweStudio 7 uxhume ingcwethi ecubungula ezombusazwe uMnu Mandlenkosi Gatsheni yena othi udaba lokuxolelana kumele luqakathekiswe.
