Icele le MDC elikhokhelwa nguMnu. Morgan Tsvangirai selilandule imbiko ethi lifuna amabandla ezombusazwe axoxisane aze avumelane ukuthi yiphi imbono ezangena kusisekelo sombuso esitsha, i Negotiated Constitution.
Amalunga aleli cele akhulume leStudio 7 athi aqhube umhlangano ekuseni lamuhla ebonisana ukuthi uhlelo lolu luqhutshwe njani, njalo awakaze abethe udaba lwe Negotiated Constitution.
Umsekeli wesikhulumi salelicele,uNkosazana Thabitha Khumalo utshele iStudio 7 ukuthi abasekeli bebandla lakhe yibo abazakutsho ukuthi bafuna kwenziweni.
Lokhu kwenzakala uhlelo lolu lusamisiwe e Harare le Manicaland kulandela udlakela kulezizigaba.
Kusenjalo, ibandla le ZANU PF lona libikwa lisithi imbono ezangena kusisekelo sombuso esitsha izavelela ebantwini.
Kodwa uMnu. Edwini Ndlovu, isikhulumi secele le MDC elikhokhelwa nguMnu. Arthur Mutambara ugcizelele ukuthi ibandla lakhe lifuna kusetshenziswe ugwalo lwe Kariba Draft, kodwa kungeniswe udaba lwe Devolution, lokunye okumbalwa okungekho kulo.
