Amacele womabili eMDC sesole inhlanganiso yeSadc ngokwehluleka ukwenza umhlangano wokuhlaziya udaba lweZimbabwe njengobekuhleliwe ngempelaviki kweleBotswana.
ISadc ibimeme uMongameli Mugabe, inhloko kahulumende uMnu Morgan Tsvangirai lomsekeli wakhe uMnu Arthur Mutambara ukuthi baze kweleBotswana ukuzongena umhlangano weSadc Troika ngoLwesihlanu langoMgqibelo.
Kodwa awusabanga khona lumhlangano ngoba umgcinisihlalo weTroika uMnu Rupia Banda, onguMongameli wakweleZambia ebengekho.
Ngalokhu iSadc ithi umlamulankunzi kudaba lweZimbabwe njalo enguMongameli weSouth Africa uMnu Jacob Zuma sezakuya eHarare kumalanga azayo ukuyakhulumisana leMDC leZanu PF ngokuhluphayo kuhulumende womanyano.
Isikhulumeli seMDC ekhokhelwa nguMnu Mutambara uMnu Edwin Mushoriwa usole iSadc wathi ukwenza kwayo sokuveze sobala ukuba ayiluqakathekisi udaba lweZimbabwe.
Amazwi akhe agcizelelwe yisikhulumeli seMDC kaTsvangirai uMnu Nelson Chamisa lengcwethi ecubungula ezombusazwe uMnu George Mkhwanazi.
