Ukuthonisiswa kukaMnumzana Roy Bennett kuqhubekele phambili emthethwandaba weHigh Court eHarare ngoLwesithathu lapho amagqwetha akhe ayangise khona umfakazi kahulumende ozithi uyingcwethi kwezama computer ngokumchaya phambi kwenkundla ukuthi kazi lutho ngalumsebenzi.
Amagqwetha la atshengise ukuba uMnumzana Perekai Mutsetse kawufundelanga lumsebenzi njalo ngesikhathi esebenzela inkampani yePost and Telecommunications wayezisisebenzi nje esingela lwazi olujulileyo (general worker).
Ephendula imbuzo yegqwetha likaBennett uNkosikazi Beatrice Mtetwa uMutsetse uthe kazi lutho ngabantu okuthiwa ngama hackers ngesilungu abalakho ukuvula amaComputer bezenzele santando bengela mvumo yomnikazi waleyo computer.
Ephendula uNkosikazi Mtetwa uthe lomntwana oleminyaka emihlanu angabakwazi ukuba kulabantu okuthiwa ngama computer hackers kulezinsuku.
UMnu Mutsetse uphinde waveza phambi kwedale ukuba kazi lutho ngabantu okuthiwa ngamaComputer forensics esithi akulabantu abanje emhlabeni. Uthe njalo kaqondisisi kuhle lendlela yokusebenzisa i software okuthiwa yi Encase lethiwa yi Forensic Tool Kit esithi kafundelanga ezobu forensic njengoba zingezokuqilibelela.
UMutsetse uthe lasekuhlolisiseni ama email atholakala eloMnu Peter Hitschman wenza okokukhangela lezoncwadi sezidindiwe engavulanga iComputer ezatholakala kuyo lokusebenzisa indlela yokuhlolisisa esebenzisa eze forensics ngoba engazazi.
UNkosikazi Mtetwa uveze ingwalo zikaMutsetse ze 'O' Level ezitshengise ukuba wehluleka ukuphumelela ngendlela atshele ngayo idale ngaphambilini. UMtetwa uphinde watshela idale ukuba uMutsetse kalazo izithupha zemfundo athi wazithola ekolitshini lase University of Zimbabwe leye Africa University.
Ukuthethwa kwecala likaBennett kuqhubekela phambili ngoLwesine. UMnu Bennett wetheswa icala lokutholakala elezikhali ezingekho emthethweni ngenjongo yokugenqula uhulumende kaMongameli Mugabe, okulicala alilandulayo.
