Abatshutshisi kucala eletheswa umgciniskhwama we bandla le MDC uMnumzana Roy Bennett lokufuna ukugenqula uhulumende sebekhweze loludaba emthethwandaba waphezulu owe Supreme Court bephikisa isinqumo sedale le High Court besithi liphosisile ngendlela elihluze ngayo loludaba.
Umthethwandaba we High Court unqume ngoMvulo ukuthi uBennett kala cala.
Kunjalo nje ukuphikisa kwabatshutshisi isinqumo sokwesulwa kwecala likaMnumzana Roy Bennet kubikwa kungaletha njalo ukufuthelana phakathi kwe MDC le ZANU PF.
AbeMDC ekhokhelwa nguMnumzana Morgan Tsvangirai besebekhangelele ukuthi njengoba icala lika Bennet selesulwe, usezafungiswa ukuthatha isikhundla sokuba ngumsekeli kamphathintambo wezokulima.
Kwesinye isehlakalo uBennet ubikwa ehluleke ukuthatha ipassport yakhe lemali yesibambiso engange US$5,000 emapholiseni eMutare amtshele ukuthi ipassport lemali le ayikho ezandleni zawo.
UBrenda Moyo weStudio 7 uxoxe lengcwethi ecubungula ezombusazwe uMnumzana Brilliant Mhlanga othi abe MDC nxa behlakaniphile bazakhipha uBennet esikhundleni sokuba ngumsekeli kamphathintambo wezokulima, yikho ukuthi abeZANU PF bekele ukumhlukuluza.
