Amalunga edale lephalamende aseqalisile ukuthola imali yama allowance efika kunkulungwane ezilitshumi lanhlanu zamadollar-$15 000 ngamunye. Limali ngeyeminyaka emithathu lapho amalunga la kade engatholi lutho.
Umphathintambo obona ngezedale lephalamende, uMnu. Eric Matinenga utshele iphephandaba le The Herald ukuthi amalunga akhangelelwe ukuqala ukubhadala izikwelede zawo zemota aziphiwa nguhulumende ngalimali.
Uthe amalunga asebenzisa ibhanga leCBZ aseyitholile limali, kuthi abasebenzisa amanye amabhanga azayithola ngokuya kwesikhathi.
UChris Gande weStudio 7 uxoxe lomela isigaba seBulawayo East edale, uNkosazana Thabitha Khumalo saqala ngokumbuza ukuthi uthini yena ngokukhonona kukazulu othi isehlakalo lesi sitshengisa ukuba uhulumende kanakekeli uzulu mathupha.
UGande uphinde waxoxa lengcwethi kwezombusazwe, uMnu. Dumisani Nkomo ukuze sizwe imbono yakhe ngaloludaba.
