Amalunga edale leSenate ebandla le MDC ekhokhelwa nguMnu Morgan Tsvangirai ngoLwesithathu aqhubekele phambili ngokutshengisela phezu kokuphatheka kwamanye amalunga eZanu PF kulelidale, aphazamisa umsebenzi obekumele wenziwe.
NgoLwesibili amalunga la atshengisele njalo ekhonona ngodaba lokuthi uMongameli Mugabe wakhetha osibalukhulu bezabelo abangamalunga eZanu PF engavumelananga labanye bakhe kuhulumende womanyano bona abangamalunga njalo eSenate.
Osibalukhulu laba abangene kuSenate ngoLwesithathu nguNkosikazi Thokozile Mathuthu oweMatebeleland North, uMnu Faber Chidarikire weMashonaland west, uMnu David Karimanzira oweHarare, uMnu Jason Machaya oweMidlands loMnu Martin Dinha oweMashonaland Central.
AbeZanu PF basole kakhulu abeMDC ngokuphazamisa umsebenzi weSenate okwamalanga amabili elandelelana.
Isivumelwano seGlobal political Agreement sikubeka sobala ukuthi ibandla leZanu PF kumele likhethe osibalukhulu abane, iMDC ekhokhelwa nguMnu Morgan Tsvangirai ikhethe abahlanu kuthi iMDC ekhokhelwa nguMnu Arthur Mutambara ikhethe oyedwa.
Kodwa uMugabe wafaka osibalukhulu bebandla lakhe leZanu PF kuzikhundla zonke lezi engavumelananga labeMDC.
UBrenda Moyo weStudio 7 ukhulume lengcwethi ecubungula ezombusazwe uMnu Qhubani Moyo yena othe ulethemba lokuthi abeMDC bazathola izithelo ezinhle ngokutshengisela kwabo lokhu.
