Amalunga enhlanganiso elwela ilungelo loluntu eye Women of Zimbabwe Arise ayisitshiyagalolunye abotshwe ngoMvulo ekuqaliseni kwayonale iviki awasamiswanga emthethwandaba lamuhla ngolweSithathu njengalokhu obekukhangelelwe ngenxa yokuphikisana phakathi kwamapholisa ngokubotshwa kwawo.
Amalunga la etheswa abotshwe ngaphansi komthetho we i Criminal Nuisance Section 46 schedule 2a (vi) kulandela ukutshengisela ekhalaza ukuthi uhulumende ethulele abantu ugwalo olungaba yisisekelo sombuso esitsha olwe Draft Constitution ngokuphangisa.
UNkosazana Magodonga Mahlangu, isiphathamandla se WOZA utshele iStudio 7 ukuthi elinye lamalunga abotshiweyo usibongile lumbile ugijinyiselwe esibhedlela esegula izolo ntambama waze wakhutshwa lamuhla ekuseni.
Kolunye udaba oluphathelane lezomthetho, idale eliphezulu eHarare linqume ukuthi amalunga ecele lemdc elikhokhelwa nguMnu. Morgan Tsvangirai etheswa icala lokubulala ipholisa ngomnyaka odluleyo aselelungelo lokudinga ukukhutshwa ngesibambiso sebail entolongweni kumthethwandaba we Supreme Court.
