Amalunga enhlanganiso elwela ilungelo loluntu eyeWOZA ayisikhombisa abotshwe ngolweSibili esetheswa icala loku buthana engelamvumo amiswe phambi komthethwandaba ko Bulawayo lamuhla lapho akhululwe ngesibambiso se bail ye $50:00 njalo atshelwa ukuthi aphindele emthethwandaba ngenyanga ezayo. Abanye abalitshumi lane bakhululwe bengetheswanga icala.
EHarare, umkhokheli wenhlanganiso elwela ukulotshwa kutsha kwesisekelo sombuso eye National Constitutional Assembly, uMnu. Lovemore Madhuku ubizwe ngamapholisa amazisa ukuthi uzamiswa phambi komthethwandaba ngenyanga ezayo lapho okuzathethwa icala lokuthi waqoqa ukutshengisela ngomnyaka ka 2006.
Isiphathamandla seWOZA uNkosazana Magodonga Mahlangu utshele uSithandekile Mhlanga we Studio 7 ukuthi inhlanganiso yakhe iyakhathazeka ngokuhlukuluzwa kwamalunga ayo.