Amalunga enhlanganiso yabesifazane abalwela amalungelo oluntu eye WOZA amane abotshwe ngeviki edluleyo etshengisela esola ukuqunywa kukagetsi mahlayana yinkampani ye ZESA e Harare, akhululwe ngolweSibili engamiswanga phambi komthethwandaba.
Amalunga la, agoqela inkokheli yalinhlanganiso u Nkosikazi Jenni Williams loNkosazana Magodonga Mahlangu, athi amapholisa abefuna ukuwabamba ngamandla ukubhadala imali yokuvuma icala ngoMgqibelo kodwa bakwala lokhu, uhulumende waze wathi bakhululwe ngolweSibili ngoba kungelabufakazi bokuthi balecala.
UMahlangu utshele uSithandekile Mhlanga we Studio 7 ukuthi inhlanganiso yakhe isimangalela amapholisa ngokubacina esitokisini bengalacala.