Amalunga enhlanganiso yeWOZA edlula inkulungwane afole etshengisela ko Bulawayo ngoMvulo ekhuthaza ukuthi uhlelo lokulotshwa kwesisekelo esitsha sombuso luqhutshwe ngokuphangisa njalo enanza ilanga lezithandani ele Valentine’s Day.
Amalunga la, aqale afola engamaqembu atshiyeneyo, ehlabela, njalo ethwele amaluba abomvu akade ewaqhubela abantu etshengisela uthando, kanye lamaphetshana alembiko ethile, andubana athi gwaqa phandle kwamahofisi e The Chronicle, lapho achasisele intathelizindaba ngenjongo yawo.
Omunye wamalunga la, uNkosikazi Selina Ncube, utshele uSithandekile Mhlanga we Studio 7 ukuthi uzaqhubeka etshengisela ngoba imuli yakhe ibhekana lobunzima obunengi ngenxa yokungami kuhle komumo welizwe.