Inhlanganiso ezizimeleyo khonapha eMelika sezisole amazwe aphetsheya zisithi ahlukuluza uMongameli Robert Mugabe kanye lomongameli Moummar Gaddaffi we Libya ngoba ababili laba bengafuni ukuba semakhwapheni ala amazwe.
Inhlanganiso lezi zithi ukwabiwa kutsha komhlabathi elizweni yikho okwabangela ukuthi amazwe aphetsheya ethese eleZimbabwe izijeziso njalo azondane loMugabe ngoba ethethe inyathelo inkokheli yamanye amazwe eAfrica ehluleka ukulithatha.
Inengi lenhlanganiso ezethula lumbiko ngezilwela amalungelo abensundu ezigoqela i New Black Panther Party, i Nation of Islam, i World African Diaspora kanye le International Association Against Torture.
Okhuluma emele lezinhlanganiso uMnu. Omowale Clay, utshele uSithandekile Mhlanga weStudio 7 ukuthi inhlanganiso lezi seziqoqe ukutshengisela ngenyanga ezayo eNew York City okubizwa ngokuthi yi “Million March in Harlem” zisola indlela imelika ephatha ngayo eleZimbabwe, eleLibya, kanye labensundu eMelika.