Uhulumende weZimbabwe ubikwa esevimbe amankampani akwele South Africa abesewaphe imvumo yokwemba ilitshe eliligugu lamadiamonds ako Chiadzwa, ukuthi amise umsebenzi.
Amankampani la athi Canadile miners le Mbada diamond mining amiswa umsebenzi nje, ngoba kuthiwa engacelanga imvumo kugatsha olubona ngezemvelo olwe Environment Management Authority. Kodwa umphathintambo wogatsha lwezokwenjiwa uMnumzana Obert Mpofu ulandula ukuthi amankampani akwele South Africa la asemiswe umsebenzi.
Amankampani akwele South Africa la abephiwe imvumo yokwemba amadiamonds akoChiadzwa laloba imithethwandaba ibinqume ukuthi eyinye inkampani yakwele Bhilithane eye Africa Consolidated Resources yiyo yodwa okumele yembe amadiamonds la.
Udaba lwama diamonds ako Chiadzwa luqhubeka luhlupha elizweni sokulemibiko yokuthi ama diamonds la asetholakala ethengiswa esigabeni seManica kwele Mozambique, njengokutsho kukasikomitshi walesisigaba, uMnumzana Jose Tefula ekhuluma lomsakazo we Radio Mozambique.
UMnumzana Walter Nsununguli Mbongolwane yingcwethi kwezenotho. UMbongolwane utshele uBrenda Moyo oweStudio 7 ukuthi ukumiswa umsebenzi kwamankampani akwele South Africa kutshengisa ukuthi engxenye kulokungazwisisani phakathi kwawo leziphathamandla zebandla leZANU PF.
