Amapholisa abophe okwesikhatshana inkokheli yecele lenhlanganiso emela amalungelo ezisebenzi eye Zimbabwe Congress of Trade Unions (ZCTU) elikhokhelwa nguMnu. Lovemore Matombo kanye labanye abakade betshengisela eHarare ngolweSithathu. Batshengisele ngenjongo yokudinga ukukhuthaza uhulumende ukuthi engezelele iholo lezisebenzi kanye lemali yazo ye pentsheni.
Ababotshiweyo yiziphathamandla zeZCTU ezibalisa oMnu. Matombo, Raymond Majongwe, James Gumbi, kanye labanye abalwela amalungelo oluntu ngoba bengavunyelwanga ukufola, njalo bavalelwa estokisini senkambeni yeHarare Central Police Station kodwa baphanga bakhululwa ntambama.
Abatshengiseleyo kabasenelisanga ukunika umphathintambo wogatsha lwezisebenzi uNkosikazi Paurina Gwanyanya ugwalo lwezikhalazo zabo, ezigoqela ukuthi akula sisebenzi okumele sithole iholo eliphansi kwePoverty Datum Line.
UMatombo uthi bakubone kufanele ukuthi batshengisele ukuze uhulumende akubone ukuqhakatheka kokubengezelela iholo.
Ngakwelinye icele, uMmnu. Japhet Moyo, unobhala jikelele wecele le ZCTU elikhokhelwa nguMnu. George Nkiwane utshele uSithandekile Mhlanga weStudio 7 ukuthi icele elikhokhelwa nguMatombo akufanelanga litshengisele lisebenzisa ibizo le ZCTU ngoba alisiyo ngxenye yalinhlanganiso.