Amapholisa afike njalo emahofisini ephephandaba le the Zimbabwe Independent bedinga intathelizindaba ezimbili. Ngeviki edluleyo amapholisa ake afika njalo esithi adinga umhleli uMnu. Constantine Chimakure lentathelizindaba, uWongai Zhangazha phezu kodaba oluphume kuleliphephandaba ngenya edluleyo lokuthi abaphathintambo kabavumelani lecebo lokuthathwa kwamankampani abelungu elikamphathintambo wezokuthukiswa kwabansundu, uMnu. Savior Kasukuwere.
Amapholisa athi loludaba luvele emhlanganweni wedale lecabinet yikho bacwayisisa ukuthi ngubani ophe lezi ntatheli loludaba. Isiphathamandla senhlanganiso yeAlpha Media Publications eyiyo edinda leliphephandaba, uMnu. Raphael Khumalo uchasisa okunengi ngaloludaba.