Amapholisa aqhubeka elokhu ebopha amalunga edale lephalamende awebandla leMDC elikhokhelwa nguMnu. Morgan Tsvangirai. Omela iGokwe Kabuyuni, uMnu. Costin Muguti ubotshwe ngolweSihlanu eGokwe. Ibandla lakhe lithi uvalelwe esitokisini seGokwe esetheswa icala lokwenza udlakela eKadoma.
Sekulabameli abathathu ababotshwe kumalanga asanda kwedlula ababalisa umsekeli kamgcinincebo, uMnu. Elton Mangoma, omela iMazoe Central, uMnu. Sherperd Mushonga loMuguti.
Kunjalo nje, amapholisa abikwa alele ibandla leZapu ukwenza umhlangano eMatobo ngolweSine lanxa kwavunyelwana ukuthi lokhu kungenzakali.
Ngomgqibelo kulemihlangano yama rally embalwa endaweni ezitshiyeneyo okuzakhomba mgceke ukuthi amapholisa azalandela na isinqumo sedale leHigh Court lesedale le Cabinet lokuthi imihlangano ingaphazanyiswa. UChris Gande weStudio 7 uxoxe lengcwethi kwezombusazwe, uMnu. Admore Tshuma oqhuba izifundo ze Conflict Resolution kweleBhilitane ukuze sizwe imbono yakhe ngaloludaba.