Icele le MDC elikhokhelwa nguMnu. Morgan Tsvangira lithi umuyi UMnu. Cephas Magura, owayeyisiphathamandla salelibandla obhubhe ngoMgqibelo odluleyo ngemva kokutshaywa kabuhlungu ngabacatshangelwa ukuthi ngamalunga ebandla le ZANU PF uzangcwatshwa kusasa eBotso eMashonaland East.
UMagura ubhubhe ngemva kokutshaywa kakubi emhlanganweni walelibandla edaweni yamavinkili eye Chimukoko Business Centre ngoMgqibelo odluleyo ngabacatshangelwa ukuthi ngabasekeli bebandla le ZANU PF. Kwalimala amanye amalunga eMDC kulesisehlakalo aze asiwa esibhedlela.
Inhlanganiso yeJOMIC yethule umbiko ngolweSihlanu isola okwenzakalayo njalo ikhuthaza ukuthi udaba lolu luhlolisiswe ngokutshetsha.
Kusenjalo, amapholisa kanye lebandla le ZANU PF kakhulu asole umbiko okhutshwe yisigodlo sabamemeli beMelika eZimbabwe ngolwesine, sibethesa umlandu wokubulawa kukaMagura.
Umbiko wesigodlo seMelika ubaqamba ngamabizo abaphatheka kuloludlakela, njalo usebenzisa amazwi aqatha anjengokuthi “yizikliwi zebandla le ZANU PF”.
Amapholisa athi umbiko wesigodlo seMelika ulakho ukuphambanisa ukuhlolisiswa kwaloludaba ngoba lusadingisiswa njalo sokubotshwe abantu abayisithupha.
Kodwa uMnu. Matshobana Ncube, ingcwethi kwezomthetho oligqwetha utshele uSithandekile Mhlanga weStudio 7 ukuthi amazwi esigodlo seMelika awasoze aphazamise ukuthethwa kwalelicala.