amalinks wokungena

Breaking News

Udaba Lokungenela Kwezombusazwe Kwebutho Lulokhu Lusidla Ubhedu


Udaba lokungenela kwezombusazwe kwenkokheli yebutho kulokhu kutshayanisa amakhanda abamabandla eMDC le ZANU PF. Ngolwesihlanu umkhokheli webutho, uMnu. Constantine Chiwenga uthe imisebenzi yabakubutho akumelanga ikhulunywe ngayo emaphephandabeni lakumisakazo ngabantu abangazi abakukhulumayo.

Izolo uMnu. Morgan Tsvangirai, umkhokheli welinye lamacele eMDC eyinhloko kahulumende, utshele umhlangano webandla lakhe edolobheni leKweKwe ukuthi inkokheli yebutho yiyo enza kubenzima ukusebenza kuhulumende womanyano.

UChris Gande weStudio Seven uxoxe lowalwa impi yenkululeko ekuvuyo leZIPRA, uMnu. Max Mnkandla okhokhela njalo inhlanganiso ye Zimbabwe Liberators Peace Initiative ngaloludaba.

Silokhu sikudaba lunye esinye isiphathamandla sebutho uMnu. Philip Valerio Sibanda ubikwa esithi ukuba khona kwamasotsha ezigabeni ezitshiyeneyo zelizwe akumangalisi ngoba aqhuba umsebenzi njalo awakhankaseli ibandla le ZANU PF njengalokhu okutshiwo ngamabandla e MDC kanye lenhlanganiso ezizimeleyo.

USibanda ugcizelele wathi amasotsha ase Rusape afundiswa ukuchapha umfula ngendlela ejulileyo njalo ayancedisa inhlelo zikahulumende kungatsha zemfundo kanye lezempilakahle.

Lokhu kwenzakala icele le MDC elikhokhelwa nguMnu. Morgan Tsvangirai lamuhla lethule umbiko lisola ukubakhona kwamapholisa lisithi yikwethusela abantu abangasekeli ibandla le ZANU PF.

UMnu. Godwin Phiri, unobhala jikelele wenhlanganiso ye National Association of Non-Governmental Organizations, iNANGO, utshele uSithandekile Mhlanga weStudio 7 ukuthi imisebenzi emihle eqhutshwa libutho ingabe ivinjwa yikuthi kwesinye isikhathi lisetshenziswa ukutshaya abantu.

XS
SM
MD
LG