Inhlanganiso ye Global Witness ithi iziphathamandla zeZanu PF kunye lamasotsha yibo bodwa abathola izithelo zomsebenzi wokwenjiwa kwamadiamonds koChiadzwa eManicaland. Limbiko ikhitshwe yinhlanganiso le ngoMvulo kugwalondaba oluveza okwenzakala ko Chiadzwa emangweni weMarange. Kodwa limbiko yehlukene leyethulwe nguMnu. Abbey Chikane owenhlanganiso ye Kimberly Process othi ngemva kokwethekelela eleZimbabwe ilitshe ledayimani lakoMarange lenjiwa ngezithukuthuku hatshi ngegazi njengalokhu okutshiwo ngabanye abafana lomkokheli we Centre for Research and Development, uMnu. Farai Maguwu. Sikhuluma nje uMaguwu ubotshwe kumaviki
amabili edluleyo wancitshwa ithuba lokuhlawula imali yesibambiso ibail.
Igqwetha lakhe, uMnu. Tinoziva Bere utshele uChris Gande owe Studio 7 ukuthi uMaguwu, obeke wathathwa ejele le Harare Remand Prison okungekho emthethweni ngamapholisa amusa eMatapi, ngalokhuke lokhu evalelwe estokisini se Matapi eMbare. Olwela ilungelo likazulu, umnu. Peter Muchengeti utshele iStudio 7 ukuthi ukuhlukuluzwa kukaMaguwu kuyamangalisa ngesikhathi kulohulumende womanyano.