Inhloko kahulumende uMnu Morgan Tsvangirai seze wavuma ukuthi ubethandana loNkosazana Locardia Tembo njalo ubekhangelele ukuthi amthathe abe ngumkakhe.
Kodwa uthi kasoze abe esamthatha ngoba senanzelele ukuthi kulezitha zakhe ezilobudlelwani lemmuli yakoTembo ezizama ukumdiliza zisebenzisa ubuhlobo lobu.
Embikweni awethule ngoLwesithathu, uTsvangirai uvumile ukuthi uthume izihlobo zakhe emmiluni yakoTembo mhlaka 18 kulinyanga ukuyadinga ubuhlobo kanye lokuhlawula ezinye indingeko.
Kodwa uthi okwenzakale kusukela khonapho akuzange kumjabulise lakancane ngoba kusuke kwangenela amaCIO encedisana labakoTembo yena engakwazi.
UMnu Tsvangirai uthe lokhu kumvuse inkophe wabona ukuthi engaqhubeka enze uTembo umkakhe, kuzakuba lula ukuba izitha zakhe zimdilize.
Ngalokhu uthe kasoze abe esamthatha, esithi uyaxolisa kakhulu kuzulu weZimbabwe ngehlazo alenzileyo.
Uphinde wathembisa ukuba uzaqhubekela phambili elwela iZimbabwe ekhululekileyo njalo nxa sethole umuntu wokuthatha othembekileyo, uzakwazisa uzulu.
UTsvangirai ubikwa ehlawule i-damage yokwenzisa uNkosazana Tembo isisu engakaziwa ngakwakhe.
Yena uTembo uphume kuphephandaba leHerald ngoMgqibelo ethanyela emzini wabazali bakaTsvangirai ebuhera. AbeMDC-T bathi uTembo wenza lokhu gaphandle kwemvumo kaTsvangirai.
Inengi lithi kulemibuzo eminengi uTsvangirai angayiphendulanga, ikakhulu mayelana lamanye amantombazana amanenginengi okuthiwa uthandana lawo.
