Umkhuhlane wendingindi ubikwa usuvukile njalo esigabeni seMashonaland central lapho osubulele khona abantwana abangamatshumi ayisikhombisa kumaviki amabibili edluleyo, kubika ugatsha lwezempilakahle.
Usibalukhulu walesisigaba uMnumzana Martin Dinha utshele lumsakazo ukuthi umkhuhlane lo uqhamuke emulini zabokholo lwesipositoli, abangazange bahlabise abantwababo amajekiseni okuvikela imikhuhlane eyisithupha ehlasela abantwana kuhlelo lukahulumende olwenziwe ngenyanga ka Nkwenkwezi.
UDinha uthi izisebenzi zehofisi yakhe yizo ezivumbulule loludaba ngesikhathi abesipositoli bezama ukufihla ukuthi abantwababo babulawa yindingindi.
Uthe abantwana bebesifa bangcwatshwe ngudlu.
Inhlanganiso ephathisa kunhlelo zabantwana eyeUNICEF ithi isacubungula ukuqhamuka kwendingindi esigabeni seMashonaland Central.
UBrenda Moyo weStudio 7 ukhulume losibalukhulu walesisigaba uMnumzana Dinha othi uhulumende uzathatha amanyathelo aqinileyo kulabo abala ukuhlabisa abantwababo amajekiseni okuvikela imikhulane.
