Iphephandaba leHerald langolweSibili libike ukuthi ugatsha lwezempilakahle obelujonge ukuhlabisa abantwana abangaba yizigidi ezinhlanu amajekiseni okuvikela imikhuhlane evame ukuhlasela abantwana, lwenelise ukuhlaba inani eledlula leli.
Isiphathamandla sogatsha lwezempilakahle uNkosikazi Portia Manangazira ubikwa etshele iphephandaba leHerald ukuthi kucine kuhlatshwa abantwana phose izigidi eziyisithupha.
Uhlelo lokuhlaba abantwanana amajekiseni okuvikela imikhuhlane egoqela indingindi, i TB, ipolio leminye luqale mhlaka 24 ngoNkwenkwezi, lwaphela mhla zimbili kuNhlangula kwezinye izigaba zelizwe kodwa kwezinye ezifana lebeitbridge lwaqhubeka.
UBrenda Moyo weStudio 7 ukhulume lesikhulumi seUnited Nations Childrens Fund, esebenzelana logatsha lwezempilakahle, uNkosazana Tsitsi Singizi othi inane asebelalo liveza ukuthi isilinganiso sokungamatshumi edlula ayisitshiya galolunye- 96% labantwana, lihlatshiwe.
