Uhulumende weBotswana uthi akula mthetho awephulayo ngokusetshenziswa kwemitshina yokusakaza yama Transmitter akulelo lizwe, ngamazwe aphetsheya agoqela iMelika, Bhilithane, France, Germany lamanye.
IBotswana yethule lumbiko ngemva kokukhonona kukahulumende weZimbabwe, othi iBotswana yephula umthetho ngokuvumela imisakazo efana lawonalo oweStudio 7 ukusakaza elizweni.
EleZimbabwe lithi imisakazo efana leStudio 7, i SW Radio Africa, le Voice of the People yethula imibiko emibi kuzulu weZimbabwe. Kodwa uzulu ukhanya ekhwabitha inhlelo ezethulwa yimisakazo le.
IBotswana ithi akula mthetho ewephulayo ngoba imisakazo le ayikho kulelilizwe, njalo amaTransmitter la esetshenziswa ngamazwe amanengi ukusakaza emazweni ambalwa hatshi eleZimbabwe kuphela.
UMnumzana Loughty Dube ngumgcinisihlalo wenhlanganiso ye Media Institute of Southern Africa- MISA. UDube utshele uBrenda Moyo weStudio 7 ukuthi uhulumende weZimbabwe nxa efuna ukuvimba abasakaza bekwamanye amazwe kumele avumele abafisa ukuvula imisakazo ngokubanika amalicence.
