Umphathintambo obona ngokwenzakala ewofisi kaMongameli Robert Mugabe njalo eyisiphathamandla seZanu PF, uMnu Didymus Mutasa uthi eleZimbabwe alifuni kubuyela kunhlanganiso ye Commonwealth libe lilunga layo.
UMnu Mutasa wethule amazwi la kulandela imibiko yokuthi iCommonwealth ilakho ukunxusa eleZimbabwe ukuthi libuyele kulinhlanganiso. Inhlanganiso le ikhangelewe ukuphatha udaba lweZimbabwe emhlanganweni wayo omkhulu oqale ngoLwesihlanu kwele Trinidad.
Indlela yokuthi eleZimbabwe libuyele ukuba lilunga lenhlanganiso le ibikwa iphendlwe libandla leMDC ngemva kokubunjwa kukahulumende womanyano, njalo lokhu yinto ekhankasela kakhulu nguhulumende weBritain.
UMongameli Mugabe ukhiphe eleZimbabwe kuCommonwelath ngomnyaka ka 2003 kulandela ukumiswa kwalo kancane (suspension) ukuba lilunga phezu kodaba lokwephulwa kwelungelo loluntu obekusenziwa nguhulumende weZanu PF.
UMnu Mutasa uthi eleZimbabwe liphume kunhlanganiso le ngokuthanda, njalo lizabuyela ngokuthanda kwalo. Wengeze wathi uhulumende uzakutsho yena nxa sefuna ukubuyela kulinhlanganiso.
Umphathintambo obona ngokwenzakala ewofisini yenhloko kahulumende uMnu Gorden Moyo utshele iStudio 7 ngolweSithathu ukuthi iMDC ifuna iZimbabwe ibuyele kuCommonwealth.
Ingcwethi ecubungula ezombusazwe uMnu Zenzo Nkomo utshele uBrenda Moyo weStudio 7 ukuthi amazwi kaMutasa aveza sobala ukuthi ibandla leZanu PF kalihloniphi inhlangothi zombili zeMDC, zona ezibamsisane lalo kuhulumende womanyano.
