Ibandla leZANU PF lithi alizikugcwalisa izibopho zeGlobal Political Agreement nxa kungesulwanga izijeziso ezafakelwa uMongameli Robert Mugabe labanye bakhe zokungethekeleli amazwe agoqela weEuropean Union, iMelika lamanye.
Ibandla leZANU PF libikwa lithethe lesisinqumo emhlanganweni wedale layo lePolitburo owenzelwe eHarare ngolweSithathu. Amabandla omathathu akuhulumende womanyano athi lona eleZANU PF lamacele womabili eMDC abelokhe eqhubeka ekhulumisana ngenjongo yokuxazulula okusele kulenga kuhulumende womanyano, okunye kwakho kuludaba lukasibalukhulu webhanga elikhulu lelizwe uMnumzana Gedion Gono, lolwegqwetha elikhulu likahulumende uMnumzana Johannes Tomana, i MDC ethi, kumele basuswe ezikhundleni.
Ibandla leZANU PF lithatha lelinyathelo ngemva kwamazwi akhulunywe ngumphathintambo wakweleBhilithane wezobudlelwano lamanye amazwe uMnumzana David Milliband ngeviki edluleyo okuthi uhulumende weleBhilithane uzaqala akhulumisane lenhloko kahulumende uMnumzana Morgan Tsvangirai anduba esule izijeziso azifakela uMugabe labanye bakhe.
UMnumzana Gorden Moyo ngumphathintambo ehofisi yenhloko kahulumende.Ekhuluma loBrenda Moyo weStudio 7 uMoyo uthe laloba kukhona okungakalungisiswa kusivumelwano seGPA isikhathi sokuncengana sesadlula, lesi sokuyisikhathi sokuthi luhulumende asebenzele ukuthuthukisa ilizwe.
UBrenda Moyo uphinde waxhuma ingcwethi ecubungula ezombusazwe uMnumzana Zenzo Nkomo othi okwenziwa libandla le ZANU PF ngamadlwane nje.
