amalinks wokungena

Breaking News

IMDC Ekhokhelwa NguMnu. Tsvangirai Iqoqa Umhlangano Wokuvuselela Amafekithali KoBulawayo


Kulandela imbiko ethi izakhamizi zalelidolobho ezedlula inkulungwane ezingamatshumi amabili zalahlekelwa yimisebenzi kulandela ukuvalwa kwamankampani afika phose ikhulu.

Icele le MDC elikhokhelwa nguMnu.Morgan Tsvangirai lithi liqoqa umhlangano omkhulu ko Bulawayo ozaphuma logwalo olukhomba ukuthi amafekithali engavuswa njani kulelidolobho.

Umphathintambo wezemali uMnu. Tendai Biti ubikwa esithi ugatsha lwakhe luzimisele ukunikeza lelidolobho imali yokuvuselela amafekithali kulandela imbiko ethi izakhamizi zalelidolobho ezedlula inkulungwane ezingamatshumi amabili zalahlekelwa yimisebenzi kulandela ukuvalwa kwamankampani afika phose ikhulu.

UMnu. Gorden Moyo, umgcinisihlalo walelibandla ko Bulawayo uthi kunengi okunye okukhathazayo kulesisigaba okuzahlafunwa njalo izinqumo ezizathathwa yilumhlangano zizaqhutshelwa ikomiti eyanikwa umlandu wokulungisa ukuvalwa kwamafekithali.

Kusenjalo, inhlanganiso ye Zimbabwe Chamber of Commerce ithi isikhweze isikhalazo kukomidi kahulumende esanda kubunjwa ebona ngokuthuthukiswa kwamafekithali edolobheni lako Bulawayo ukuthi kufanele amabhanga alelidolobho eboleke osomabhizimusi imali engalindelanga imvumo evelela eHarare ngoba lesi ngesinye sezizatho ezixotsha abamafekitheli kulelidolobho.

UMnu. Eric Block ongumgcinisihlalo wenhlanganiso esanda kubunjwa eye Commitee for the Development of the City of Bulawayo utshele iStudio 7 ukuthi osomabhizimusi belizweni bayehluleka ukuncintisana lamabhizimusi emazweni agoqela eleChina bona abangenisa impahla lula elizweni.

UMnu. Isaac Mabuka, umgcinishlalo wogatsha lwakoBulawayo olwe Zimbabwe National Chamber of Commerce, utshele uSithandekile Mhlanga we Studio 7 ukuthi osomabhizimusi abanengi sebekhetha ukusebenzela eHarare ngenxa yohlupho lwemali koBulawayo.

XS
SM
MD
LG