Idale labaphathintambo bakahulumende lihluze ingxabangxoza ekhona kuhlelo lokubalwa kwabantu ngoLwesibili lavumelana ukuthi abakubutho kabamelanga baphatheke ekubalweni kukazulu, kodwa babale imuli zabakubutho lamapholisa abasezinkambeni ezitshiyeneyo.
Amasotsha lamapholisa abikwa sengenele kuhlelo lweCensus endaweni ezinengi zelizwe avimba ababalisi, abayibo abavame ukwenza lumsebenzi.
Kodwa osaphethe isikhundla sikamphathintambo wezemali, uMnu Gorden Moyo uthi iCabinet ilaye ukuthi amapholisa labakubutho kumele babalane bona bodwa, kuthi uzulu jikelele abalwe ngababalisi kanye lezinye nje izisebenzi zikahulumende.
Ingxabangxoza le isibangele ukukhulumisana kubi phakathi kwababalisi benhlanganiso ezitshiyeneyo ezigoqela iProgressive Teachers Union of Zimbabwe (PTUZ) leZimbabwe Teachers Association (Zimta).
Inhlanganiso yePTUZ ithi amalunga ayo yiwo wodwa atshiywa phandle kuloluhlelo, kungeniswa aweZimta lawe Teachers Union of Zimbabwe (TUZ). Kodwa uMnu Moyo uthi nxa kusenzakala lokhu, yinto engekho emthethweni.
Isiphathamandla sePTUZ uMnu Enoch Paradzi utshele iStudio 7 ukuthi ubandlululo lolu lwenzakala kakhulu ezabelweni zeMashonaland.
Kodwa isiphathamandla seZimta uMnu Sifiso Ndlovu ukulandule ukuthi kulokubandlululwa kwababalisi ngokuthi bavela kuyiphi inhlanganiso.
