amalinks wokungena

Breaking News

I-Botswana Ithi Izadubula Inkomo zeZimbabwe Ezilahlekela Khona


EleBotswana lithi lizadubula inkomo zeZimbabwe ezingena kulelozwe emizameni yokuvimba umkhuhlane wamasondo owe Foot and Mouth

Abalimi eBotswana sebamukele inyathelo likahulumende wabo lokubalala inkomo zeZimbabwe ezingena kweleBotswana, kuyindlela yokulwisana lomkhuhlane womlomo lamasondo - ifoot and mouth.

Abalimi laba bathi bayalamukela inyathela lokudubula inkomo ezivela eZimbabwe ngoba zilakho ukuletha umkhuhlane wamasondo lomlomo. Bathi inkomo zabo uma zingangena eZimbabwe nxa seziphenduka ziyabulawa bephiwe amatshumi amane amadola eMelika kumbe amakhulu amane amaPula, kodwa inkomo zona zibulawe.

Umnumzana Joe Chikumba ovela esigabeni seJakalasi duze komngcele weZimbabwe ulamukele lelinyathela ethi noma libuhlungu, yiyo indlela yokulwisana lemikhuhlane yenyamazana.

"Mina ngibona kulinyathela eliqondileyo ngoba inkomo zeBotswana zingangena eZimbabwe asikwazi ukuthi zibuya ziphetheni, njalo ezabo lazo zingangena ngapha asazi ukuthi zibuya lani".

Uhulumende weBotswana yena uthi njengomthengisi wenyama emazweni awenhlanganiso yeEuropean Union, kuqakathekile ukuthi alwisane lemikhuhlane yenkomo ngazo zonke indlela. Ethi angayekela ukwenza njalo, uzalahlekelwa yibhizimusi ebiza izigidi legidi zamadola.

Omunye oweZimbabwe, umnumzana Daniel Ncube laye uthi kakuboni kungumona ukubulala inkomo lezi, ikakhulu uhulumende weBotswana esenikeze iZimbabwe inyanga ezintathu engakaqali inyathela leli.

"Yindaba edanisayo ukuthi inkomo ziyabe zibulawa kodwa abakithi labo ngiyabasola ngoba kade batshelwa ngenkomo zabo ezingena eBotswana. Njalo iBotswana inikeza iZimbabwe imithi yokulwisana lemikhuhlane yezifuyo".

Abalimi ezigabeni zeZimbabwe eziseduze leBotswana sebeyazisiwe ngeyathela leli ukuze bagcine izifuyo zabo zingamuki zeqe umngcele.

IBotswana leZimbabwe zabamba umhlangano eGaborone ngenyanga edluleyo lapho okuxoxwe ngesikwelede iZimbabwe elaso semithi yezifuyo, iBotswana isithi noma kunjalo izaqhubeka incedisa.

please wait

No media source currently available

0:00 0:01:49 0:00
Lapho esitholakala khona

XS
SM
MD
LG