Izisebenzi zenkampani yendizamtshina eye Air Zimbabwe ezedlula amakhulu ayisikhombisa, zibikwa zivimbele emahofisini iziphathamandla ezimbili zalinkampani ngolweSine ebusuku, ngendlela yokutshengisela ukuthi zifuna ukubhadalwa imali yazo yeholo ngokutshetsha.
Ababili laba ngumgcinisikhwama walinkampani uMnu. Nicholas Mujeri lomqondisi wayo uMnu Moses Mapanda, njalo bavumile ukuthi inkampani le idinga izigidi ezedlula ezinhlanu zamadollar, $5, 6 million ukuthi ibhadale izisebenzi.
Kusenjalo, inkampani ye China iHainan ibikwa isithi isitshele umongameli Robert Mugabe ukuthi inkulumo zokuthi imanyane lohulumende weZimbabwe ekuvuseleleni inkampani le ziqhubekela phambili njalo zilakho ukuphumelela.
UMugabe useChina lapho akhuthaza amankampani azimeleyo, kanye lohulumende walelolizwe ukuthi avule amabhizimusi eZimbabwe.
Ukuhlaziya loludaba, uSithandekile Mhlanga weStudio 7 uxoxe loMnu. George Mkhwananzi, ingcwethi ecubungula ezombusazwe njalo elilunga lecele le MDC elikhokhelwa nguMnu. Morgan Tsvangirai, yena ogcizelela ukuthi eleChina lisacathula njalo lingathenjwa ezintweni ezinengi ezigoqela ulwazi lwemitshina yangalezi nsuku eye technology.