Uhulumende weMelika usesethula umthetho omutsha ozathatha indawo yalowo osolwa libandla leZANU PF oweZimbabwe Economic and Democracy Recovery Act-ZEDERA, owethulwe ngomnyaka ka 2001 nguhulumende kamongameli George Bush.
Umthetho omutsha lo owe Zimbabwe Transition to Democracy and Economic Recovery Act, usungulwe ngolweSibili ngamalunga edale leSenate agoqela uMnu Russ Feingold, uMnu John Kerry loMnu Johnny Isakson.
Umthetho weZEDERA uvimba uMongameli Robert Mugabe lamalunga eZANU PF ukwethekelela eMelika, usenqabela njalo amankampani alobudlelwano leZANU PF ukuthi adlelane lamankampani eMelika.
Phansi kweZimbabwe Transition to Democracy and Economic Recovery bill, ingapaswa ibe ngumthetho, izijeziso kumongameli Mugabe leziphathamandla zeZANU PF zizaqhubeka zikhona, kodwa izavumela iMelika ukuthi incedise uhulumende womanyano ikakhulu kwezokulima ezempilakahle, ezemfundo kanye lengatsha zikahulumende ezitshiyeneyo ngemali.
Inhlanganiso ezimeleyo eyeAfrica Action itshayele ihlombe amalunga esenate asungule lumthetho, isithi umthetho weZEDERA mubi ngoba ungayinanzi inguquko esibekhona eZimbabwe.
UBrenda Moyo weStudio 7 uxoxe loMnumzana Dominic Muntanga umkhokheli wenhlanganiso eletha ndawonye izizalwane zeZimbabwe ezisemazweni ukuze ziphathise ekuthuthukiseni ilizwe, ethiwa Council for Zimbabwe. UMuntanga uthi inyathelo elifuna ukuthathwa nguhulumende weMelika lihle ngoba lizaletha inguquko empilweni kazulu jikelele weZimbabwe.
