UHulumende wakweleSouth Africa usethumele iqula labosomabhizimisi ukuba lizodinga amabhizimisi abangawasungula eZimbabwe, libheke kakhulu umsebenzi wezemigodi ezokwethekelelwa kwelizwe kanye lelingakuthola edolobheni lakoBulawayo.
UMsekeli kaMpathintambo obona ngezamabhizimisi kweleSouth Africa, uMnumzana Mzwandile Masina okhokhela iqula labosomabhizimisi leli, ubike ukuba uBulawayo ulakho ukuvuselelela amabhizimisi kwezokwethekelela, ezokwakha kanye lezamasiko njalo bakhangelele ukuqala amabhizimisi iloba yisiphi isikhathi.
Umphathintambo Masina ubike ukuba uBulawayo usemnyango weSouth Africa ngakho ukusungula amabhizimisi akusoze kubeluhlupho kangako, njalo kuzakwehlisa inani labasakhulayo bakweleZimbabwe abacapha umngcele besiyadinga umsebenzi ezweni lakhe.
Umsekeli kaMeya wakoBulawayo, uKhansila Gift Banda, yena ubike ukuba manengi amabhizimisi abawabonise osomabhizimisi beSouth Africa angasungulwa edolobheni leli njalo bayethemba ukuba lizabuyela kusimo elaliyikhokhona izolo ukuze abantu bathole imisebenzi njalo lithuthuke.
Umsekeli kaMphathintambo obona ngezokuthengiselana kunye lokulungiswa kwezinto kweleZimbabwe, uNkosikazi Chiratidzo Mabuwa omele i-Mberengwa South edale lephalamende ubike ukuba uyajabula ngokuza kwesithupha kweSouth Africa kuleli ethi lonyaka bajonge ukuzoqala amabhizimisi okuzakwenza ukuba ubudlelwano beZimbabwe leSouth Africa kwezokuthengiselana kuqine ngoba bakhangelele ukuvula amankampani ambalwa okuzathuthukisa umnotho weZimbabwe.
Ubike njalo ukuba ubudlelwano beSouth Africa leZimbabwe buya buqina ngoba lonyaka iSouth Africa itshengise isifiso sokuvula amankampani amanengi okulakho ukuthuthukisa umnotho weZimbabwe.
Umgcnisihlalo wenhlanganiso yezakhamizi eye Bulawayo Progresive Residents Association, uMnunzana Winose Dube yena ubike ukuba njenge nhlanganiso bayalwamukela ngenjabulo uhlelo lwabe South Africa lokuzosungula amabizimisi koBulawayo bezosebenzelana labosomabhizimisi babo emisebenzini esemthethweni okuzakwehlisa ubugwelegwele balabo abathanda ukufumbathiswa andubana abantu basungule amabhizimisi.
lezizalwane zeZimbabwe zihlala zibhekise amabombo kweleSouth Africa lisiyadinga imisebenzi, ngakhoke ukusungulwa kwamabhizimisi elizwani kukhangelele ukwehlisa inani labasakhulayo abachapha imingcele bengela mfanelo zengwalo eziqondileyo zokudinga umsebenzi kanye lokuvuselela umnotho welizwe wona osubhazalele ngesisu.
Kunjalo nje, ummeli weZimbabwe kwele South Africa, uMnu. Isaac Moyo uthi isigodlo sakhe siphakathi kwemizamo yokukhulumisana lezizalwane zeZimbabwe ezikwele South Africa ukuthi ziyesungula amabizimusi kulelolizwe.
UMoyo utshele iphephandaba le The Chronicle ukuthi ukuphatheka kwezamabhizimusi kwezizalwane zeZimbabwe ezikwele South Africa kuqakathekile kakhulu kunqubelaphamabili yelizwe.
Lokhu kulandela umhlangano omkhulu owezamabhizimusi owenzelwe kwele South Africa ngeviki edluleyo phakathi kweziphathamandla zalelolizwe leze Zimbabwe.
Kodwa umkhokheli wenhlanganiso yeZimbabweans In South Africa, uMnu. Nqabutho Nicholas Mabhena utshele iStudio Seven ukuthi lanxa izizalwane zeZimbabwe zifuna ukuyasungula amabhizimusi ekhaya inking yikuthi kabamthembi uhulumende.