Inhlanganiso yomanyano wamazwe awezwekazi le Africa eye African Union isolwa kakhulu ngoba ingelakho okunengi ekwenzayo okungenelisa ukuguqula impilo lenhlalakahle kazulu wemazweni akulumkhono ngoba layo isehluleka ukulandela ezinye zezivumelwano zayo ezigabeni ezitshiyeneyo.
Kusenjalo, umongameli Robert Mugabe uthi izwekazi le Africa akumelanga likhangelwe njengendawo elemikhuhlane lendlala kuphela, njalo umdlalo we World Cup ozaphathwa yi South Africa ngenyanga ezayo yisibonelo esihle sokuthi kukhona okuhle okungenziwa ngamazwe la.
UMugabe ukhulume la mazwi lamuhla ngelanga lokunanza i Africa Day, elithakazelela ukubunjwa komanyano wamazwe e Africa ngomnyaka ka 1963 e Ethiopia. Indikimba yalonyaka yikuletha ukuthula ezwekazi le Africa ngemidlalo.
Inhlanganiso ezizimeleyo, kanye lamabandla ezombusazwe, agoqela icele le MDC elikhokhelwa nguMnu. Morgan Tsvangirai zethule imbiko etshiyeneyo yokunanza lelilanga. UMnu. George Mkhwananzi uthi amazwe e Africa awabambananga, njalo abuyela emuva kungqubekela phambili kwezomnotho, ezombusazwe, kanye lokunanzwa kwamalungelo oluntu.
