Icele le MDC elikhokhelwa nguMnu. Welshman Ncube libe ledili elikhulu lokunanza ilanga le Africa Day eStanley Square koBulawayo ngolweSihlanu, lapho obekuvunulwe ezesintu njalo kudliwa ukudla kwesintu okufana lamacimbi, umxhanxa, umngqutshu, amasi, inopi lomcaba.
Isikhulumi salelibandla, uMnu. Nhlanhla Dube, uthi bekunanzwa amalungelo abesifazana, njalo umkakhe womkhokheli walelibandla uNkozikazi Thobekile Siwela-Ncube nguye obengumhlonitshwa
Lokhu kwenzakala eleZimbabwe limanyene lamanye amazwe ukunanza lelilanga ikamhlaka 25 ngoNkjwenkwezi, nganxanye inhlanganiso ezizimeleyo lamabandla ezombusazwe zisithi lokhu kungananzwa amalungelo abantu elizweni.
UNkosazana Thabitha Khumalo, umsekeli wesikhulumi secele le MDC elikhokhelwa nguMnu. Morgan Tsvangirai utshele uSithandekile Mhlanga weStudio 7 ukuthi amapholisa lokhu athatha uhlangothi lwebandlale ZANU PF nxa eqhuba umsebenzi.