Umhlangano wenhlanganiso yeKimberly Process obuqhuthelwa kwele Israel uphele namhla kungelasixazululo kudaba lokuthi eleZimbabwe livunyelwe na ukuthengisela amazwe omhlaba amadayimana alo ako Chiadzwa.
Umhlangano lo bekumele uphele izolo kodwa wadluliselwa phambili waphela namhla, ngoba iziphathamandla ziphikisane kakhulu ngodaba lweZimbabwe. Umhlangano uze wagqitshwa kungela kuvumelana.
Isikhonzi seKimberly Process eZimbabwe uMnumzana Abbey Chikane uchasisele umhlangano lo ukuthi eleZimbabwe selilandela iziqondiso zenhlanganiso le ngakhoke kumele ivunyelwe ukuthengisa amadayimana akoChiadzwa.
Inhlanganiso ezilwelwa ilungelo loluntu ezifana leHuman Rights watch bezikhankasela ukuthi eleZimbabwe lincitshwe imvumo yokuthengisa amadayimani ako Chiadzwa, ngoba kulokwephulwa kwelungelo loluntu emigodini le.
Umphathintambo obona ngezemigodhi lezokwenjiwa uMnumzana Obert Mpofu obesemhlanganweni we Israel lo utshele intathelizindaba izolo ukuthi eleZimbabwe lingaze lincitshwe imvumo yokuthengisa amadayimana ako Chiadzwa lizawathengisa ngenkani, ngoba ilizwe lifuna imali.
IKimberly Process ithi udaba lweZimbabwe soluzaphathwa emhlanganweni ozakwenziwa kwele Russia ngenyanga ezayo.
UBrenda Moyo weStudio 7 ukhulume lengcwethi ecubungula ezombusazwe uMnumzana Bekithemba Mhlanga osipha imibono yakhe ngaloludaba.