Amabandla akuhulumende womanyano athi ajabule kakhulu ngokuvunyezwa kweZimbabwe yinhlanganiso yeWorld Diamond Council ukuthi ithengise amadayimana ayo eMarange.
Inhlanganiso le ithethe isinqumo lesi emhlanganweni oqhutshelwe kweleRussia. Okwamanje isikhonzi seKimberly Process, uMnu Abbey Chikane sesikhangelelwe ukuza eZimbabwe ngenyanga ezayo ukuzesungula uhlelo lokuthengiswa kwalawa madayimana.
Uhulumende uthi kulamadayimana afika 6 million karats enjiwe ngamankampani abalisa iCanadile leMbada amelele athengiswa njalo azalethela ilizwe imali engangamabillion amabili amadola eMelika-US$2 billion.
Abalwela ukuhlonitshwa kwelungelo loluntu bemanyene lamazwe agoqela iMelika kanye leBhilithani bebekhankasela ukuthi iZimbabwe ingavunyelwa ukuthengisa amadayimana lawa besithi enjiwa kungananzwa amalungelo kazulu.
Isikhulumeli seZanu PF uMnu Rugare Gumbo uthi ibandla lakhe lamukele ngesihle inyathelo leWorld Diamond Council, esithi ukuthengiswa kwamadayimana lawa kuzancedisa ekuvuselelweni komnotho.
Ilunga ledale lephalamende njalo ekucele leMDC elikhokhelwa nguMnu Arthur Mutambara, uMnu Thandeko Zinti Mnkandla uthi lanxa kuyinto ethokozisayo ukuthi iZimbabwe size yathola imvumo yokuthengisa amadayimana eMarange, kumele uhulumende elungisise udaba lokwephulwa kwelungelo loluntu kulimigodi.
Icele leMDC elikhokhelwa nguMnu Morgan Tsvangirai lalo lithi lijabule kakhulu ngesinqumo seWorld Diamond Council. Kodwa lalo lithi udaba lokwephulwa kwelungelo loluntu kumele lulungisiswe.
