Inhlanganiso yezisebenzi zemapulazini eye General Agricultural Plantation Workers Union of Zimbabwe yethule umbiko lemifanakiso etshengisa ukuhlukuluzwa okwesabekayo okwenziwa izisebenzi zemapulazini kusenziwa yilabo abangena emapulazini ngodli kwele South Africa.
Umbikolo olesihloko esithi ‘Nxa kukhona okonakeleyo’ uqoqwe yinhlanganiso yabasebenzi bemapulazini eye GAPWUZ ngokusebenza ndawonye leye Research Advocacy Unit i-RAU. Lumbiko ulandisa indaba esukumisa inwele zocuku lokuhlukuluzwa kwabalimi abalikhulu lamatshumi ayisithupha lesikhombisa lezisebenzi zabo.
Lobanje lumbiko uveza udlame oluqale ngo 2000, uqukethe njalo izehlakalo ezinengi ezenzeke sekubunjwe uhulumende womanyano. Izisebenzi zilandisa indaba ezibuhlungu, zokubhaxabulwa , ukuthunjwa, ukuhlukuluzwa kanye lokubulawa mahlayana kwabanye.
