Umsakazo we British Broadcasting Corporation uqale ukusakaza kweleZimbabwe ngolweSithathu ngemva kokuvinjwa kwawo ngulumende okweminyaka eyisitshiyagalombili edluleyo.
Uhlelo lwe BBC lolu luphume emsakazweni we 5 live njalo lwenzelwe ehoteleni ye Meikles eHarare. Uhlelo lolu olulodwa ngolwakuqala olwenziwe ngu Victoria Derbshire okhangelelwe ukwenza ezinye inhlelo kwelizayo. Uhulumende kamongameli Robert Mugabe uxotshe i BBC elizweni ngomnyaka ka 2001.
Kuthe ngemva kokubunjwa kukahulumende womanyano imisakazo eyayikade yaxotshwa elizweni efana layo i BBC le CNN yakweke Melika iphiwe imvumo yokusakaza eZimbabwe.
Kolunye udaba olumayelana lezokusakaza eleZimbabwe lithi lizakusa isikhalazo kuhulumende weleBotswana ngokuvumela imisakazo yakwamanye amazwe ukusebenzisa imitshina ekuleli lizwe ukusakaza okungekho emthethweni, kweleZimbabwe.
EleZimbabwe likhonona ngemisakazo egoqela wonalo oweStudio 7 osakaza useMelika, i SW Radio Africa esakaza ikweleBhilithane le Voice of the people esebenzisa imitshina yeRadio Netherlands. Udaba lwemisakazo engaphandle kwelizwe ngolunye oluhluphayo kuhulumende womanyano abeZANU PF besithi kumele ivalwe njalo kuyinto eyavunyelwana kulotshwa isivumelwano seGlobal Political Agreement.
Kodwa abasakaza besemazweni laba bakhala ngokuthi uhulumende kumele avule amagagasi emisakazo anike abafuna ukuvula imisakazo yabo amalicence. Uhulumende ukhanya elokhe ehudula inyawo kulokhu.
UMnumzana Walter Nsununguli Mbongolwane yingcwethi ecubungula ezombusazwe. UMbongolwane utshele uBrenda Moyo weStudio 7 ukuvumela umsakazo we BBC ukusakaza elizweni yindlela yokuzama ukubamba inhlanganiso yeSADC amehlo ukuze ibone angani kulenguquko ekhona kuhulumende womanyano.
