Inhlanganiso ezizimeleyo ziqhubeka zibambisana labezinkonzo kanye lekomidi yeJomic emizameni yokulwisana lodlakela kwezombusazwe.
Minengi imbuthano esiyenziwe elizweni jikelele ikakhulu zinhlanganiso zabezinkonzo zokholo yokukhuthaza ukuthula.
Ekupheleni kwalinyanga, inhlanganiso yeBulawayo Agenda ithi izaba lomkhosi eLupane, emangweni weGomoza ozahlanganisa abamabandla ezombusazwe bekhuthaza uzulu ukuthi atshiyane lodlakela.
Abahlabeleli, imbongi abezinkonzo kanye labeJomic labo bazakubakhona kulumbuthano.
Ukubulawa kwelunga leMDC ngabanakanelwa ukuthi ngabeZanu eMudzi kumaviki amabili edluleyo kutshiye uzulu ethithibele ethinteka amanxeba odlakela luka2008.
Umqondisi weBulawayo Agenda uMnu Thabani Nyoni utshele lumsakazo ukuthi inhlanganiso yakhe ikhathazeke kakhulu ngodaba lodlakela.
Ilunga leJomic uNkosazana Thabitha Khumalo uthi bayayamukela imizamo yenhlanganiso ezizimeleyo ekulwisaneni lodlakela.