UMnumzana Edward Mkhosi ongomunye wabagcinisihlalo be COPAC, uthi ngenxa yokuphazamiseka kwemihlangano yokuthapha imbono kazulu kwezinye indawo zelizwe sebekhangelele ukuthi uhlelo lonke lokulotshwa kwesisekelo sombuso esitsha luyaze lugqitshwe ngomnyaka ozayo.
Ngakwelinye icele iqula le COPAC elithapha imibono kazulu ezangena kusisekelo sombuso esitsha eBeitbridge libika ukuthi abantu bakule indawo bayala ukupha imbono yabo besithi abezwa indimi ezisetshenziswa ngamalunga alo.
Kunjalo nje, inhlanganiso elwela ilungelo loluntu eye Human Rights Watch yethule umbiko othi uhlelo lokuqoqa imbono yabantu ezangena kusisekelo esitsha sombuso luqhutshwe phakathi kodlakela olwesabekayo endaweni ezigoqela i Harare, i Manicaland le Mashonaland, okuveza sobala ukuthi ibandla le ZANU PF kalihloniphi uhulumende womanyano.
Umbiko lo ugcizelelwe ngenye inhlanganiso elwela ilungelo loluntu eye Zimbabwe Peace Project, yona ethi udlakela lubhahe emaphandleni, kusetshenziswa induna labosobhuku ukuhlukuluza abantu.
USithandekile Mhlanga we Studio 7 uxoxe lo Mnu. Walter Nsununguli Mbongolwane, ingcwethi ecubungula ezombusazwe ukuze sizwe imbono yakhe ngodaba lwe constitution.