Umphathintambo wezomvikela uMnu Emmerson Mnangagwa uthi lanxa ibandla leZanu PF lingaze linqotshwe kukhetho, alisoze livumele abeMDC bethatha intambo zombuso ngoba beyizikhothamathe zamazwe ayizitha zeZimbabwe.
Iphephandaba leHerald libika ukuthi uMnangagwa utshele abasekeli beZanu PF eMasvingo ngeviki edluleyo ukuthi ibandla lakhe lizakwenza konke okusemandleni alo ukuthi iMDC ingaze yangena embusweni.
Wengeze wathi bonke abafa belwela uzibuse okhululekileyo bengadana kakhulu emalibeni abo nxa iMDC ingazifinyelela intambo zombuso.
Kodwa isikhulumeli seMDC ekhokhelwa nguMnu Morgan Tsvangirai uMnu Nelson Chamisa usole kakhulu amazwi kaMnangagwa esithi aveza sobala ukuthi iZanu PF libandla lezikliwi.
Embikweni ewethule ngolweSibili iMDC isole amapholisa isithi ukuphatha kwawo abasekeli beZanu PF ngesandla esibuthakathaka yikho okubangela ukuthi baqhubeke bebangela udlakela elizweni.
