Icele le MDC elikhokhelwa nguMnu. Arthur Mutambara lithi selikhweze isikhalazo kuhulumende we South Africa sokuthi incwadi zokuphiwa imvumo yokuhlala kulelolizwe ngokusemthetwheni, ama permits anikwa izizalwane zeZimbabwe, abe ngaweminyaka emihlanu hatshi emine kuphela.
Ngemva kweminyka emihlanu, abantu balakho ukudinga imvumo yokuhlala kuze kubephakade kwele South Africa, i Permanent Residence.
Isiphathamandla salelibandla, uMnu. Ngqabutho Dube, utshele uSithandekile Mhlanga weStudio 7 ukuthi ngaphandle kwengxaki ezithile, uhlelo lwama permits luqhubeka kuhle njalo abadinga ubuphepheli bayazikhethela ukuthi badinge ama permit kumbe beqhubeke beyiziphepheli.