Ibandla le MDC elikhokhelwa nguMnumzana Morgan Tsvangirai libikwa selikhankasela ukwesulwa kwezijeziso zenotho ezafakelwa umongameli Robert Mugabe labanye bakhe kubandla le ZANU PF kanye lamankampani alobudlelwano lebandla leli.
Umphathintambo osebenzela ehofisini yenhloko kahulumende uMnumzana Morgan Tsvangirai, uMnumzana Gorden Moyo ubikwa etshele umhlangano wenhlanganiso yeBulawayo Agenda ngeviki edluleyo ukuthi ibandla le MDC selikhankasela ukuthi amazwe aku European Union esule izijeziso ezethulelwa amankampani angamatshumi amane agoqela i ZISCO steel, Zimbabwe Mining Development Corporation, iZimbabwe Defence Industries lamanye.
UMoyo uthi uhulumende womanyano usezama ukukhulumisana le European Union entweni ezinengi ezigoqela udaba lwama Sanctions.
Imizamo yokukhuluma loMoyo ngaloludaba yehlule kodwa istudio 7 ixhume umsekeli wesikhulumi salelibandla uNkosazana Thabitha Khumalo othi amabandla wonke akusivumelwano se global political agreement kumele akhankasele ukwesulwa kwama sanctions.
