amalinks wokungena

Breaking News

I MDC Isungula Uhlelo Lokwethulela Uzulu Ngokwenzakalayo Elizweni


Icele leMDC elikhokhelwa nguMnu Morgan Tsvangirai selisungule uhlelo lokwethulela abasekeli balo lozulu jikelele okwenzakala kwezombusazwe elizweni jikelele lisebenzisa incingo.

Kulenombolo uzulu amele azitshaye ukuze enelise ukuthola izindaba lezi kungelambadalo. IMDC ithi ithethe inyathelo leli ngoba izindaba eziphathelane layo zingaphunyiswa kuhle ngabasebenzela imisakazo kanye lamaphephandaba kahulumende.

Kodwa uhlelo lolu soludunge ukufuthelana okuvele kukhona phakathi kweMDC leZanu PF yona ethi alukho emthethweni. IZanu PF ithi nxa iMDC ifuna ukuqhubeka ngohlelo lolu kumele ibhalise kugatsha lwePostal and Telecommunications Regulatory Authority (POTRAZ).

Iphephandaba leHerald lithi inkampani yeEconet, ebikwa iyiyo encedisa iMDC ekwethuleni loluhlelo ilakho ukuvalwa. Kodwa iziphathamandla zalinkampani zithi azilani lokwenza lezombusazwe.

Umsekeli wesikhulumeli seMDC kaTsvangirai uNkosazana Thabitha Khumalo utshele uNtungamili Nkomo weStudio 7 ukuthi okwenziwa yiZanu PF yikuzama ukuvimba ibandla lakhe ukuthi lazise uzulu ngokwenzakalayo.

XS
SM
MD
LG