Iphephandaba le Herald libika ukuthi inhloko kahulumende, engumkhokheli njalo welinye icele le MDC uMnumzana Morgan Tsvangirai seze wavuma ukuthi amazwe angentshonalanga afakela ilizwe izijeziso zenotho esezibangele ubunzima kuzulu jikelele.
Kodwa isikhulumeli sika Tsvangirai, uMnumzana James Maridadi uthi uTsvangira kazange akhulume ngama sanctions emhlanganweni awenze labasekeli bebandla lakhe ngeSonto, esithi ukhulume ngama "restrictive measures".
Ibandla le MDC lihlala likhala ngemibiko engaqondanga ehlezi isethulwa liphephandaba le Herald mayelana ngalo laloba sokwabunjwa uhulumende womanyano.
UMaridadi uthi izijeziso lezi ezafakelwa uMongameli Robert Mugabe labanye bakhe zilakho ukwesulwa nxa amabandla wonke akuhulumende womanyano engahlonipha isivumelwano se Global Political Agreement.
Umsekeli wesikhulumeli sebandla leli, uNkosazana Thabitha Khumalo utshele uBrenda Moyo weStudio 7 ukuthi iZanu PF isebenzisa iphephandaba le Herald ukugcona uTsvangirai ukwenzela ukuthi uzulu weZimbabwe ambone njengomuntu oyehluleka ukuletha inguquko elizweni.
