Ibandla leMDC elikhokhelwa nguMnu Morgan Tsvangirai selikhuthaze amapholisa ukuthi ebophe umkhokheli wenhlanganiso yabalwa impi yenkululeko eyeZimbabwe National Liberation War Veterans Association uMnu Jabulani Sibanda lisithi ukhokhela umkhankaso wokuhlukuluza uzulu weMasvingo encedisana labanye abasekeli beZanu PF.
I MDC ithi ngeviki edluleyo uSibanda umise izifundo esikolo seNhema Primary School ngokubamba ababalisi kulesisikolo ngamandla ukuthi baphatheke emhlanganweni ayewubizile.
Emhlanganweni lo, iMDC ithi uSibanda uxwayise uzulu ukubana engavele ekele ukuvotela iZanu PF kukhetho oluzayo, uzakubona okwabonwa yingidi.
I MDC ithi uSibanda labanye bakhe sebefike endaweni ezifana leMashonaland Central leManicaland besethusela uzulu ukuze engavoteli amanye amabandla angayisi Zanu PF kukhetho oluzayo.
Imizamo yokukhulumisana loSibanda ngodaba lolu yehlule. Kodwa ngenyanga edluleyo uSibanda utshele iStudio 7 ukuthi okukhulunywa yiMDC ngamanga.
