Ele Norway selikhuthaze umanyano weAfrican Union ukuthi ungenele ngamandla kulungisiswe okuhluphayo kuhulumende womanyano phakathi kweZanu PF leMDC.
Isicelo lesi sethulwe ngumphathintambo obona ngezentuthuko kweleNorway ngoLwesithathu, uMnu Erik Solheim yena oke wethekelela eZimbabwe nyakenye wabonana loMongameli Mugabe kanye loMnu Morgan Tsvangirai.
Ekhuluma eseMalawi ngemva kokuhlangana loMongameli wakulelo lizwe uMnu Bingu wa Mutarika, uMnu Solheim uthe ilizwe lakhe likhangelele kuMutarika njengomgcinisihlalo weAfrican Union ukuthi akhokhele imizamo yokulungisisa udaba lweZimbabwe kanye lengxabangxoba yeKenya.
EleZimbabwe linikezwe isikhundla kuAfrican Union Security Council ngenyanga edluleyo, okwenza kubenzima kuAU ukuthi ingenele kwezombusazwe zakuleli lizwe, kutsho ocubungula ezombusazwe uMnu Immanuel Hlabangana.
Kolunye njalo udaba, umqondisi wenhlanganiso ephathisa amazwe omhlaba ngemali eye International Monetary Fund uMnu Dominique Strauss-Kahn ugcizelele isinqumo salinhlanganiso esokuthi kayisoze iqalise njalo ukuphathisa iZimbabwe ngemali ngoba ezombusazwe zingakalungisiswa kanti njalo lohulumende engakahlawuli isikwelede sakhe.
UMnu Kahn wethule amazwi la eseSouth Africa ngemva kokuhlangana loMongameli Jacob Zuma. UKahn utshele intathelizindaba ukuthi emhlanganweni wakhe loZuma ngoLwesibili bakhulume kabanzi ngodaba lweZimbabwe uZuma wacela i IMF ukuthi iqalise ukunikeza iZimbabwe imali ukuze yenelise ukuvuselela umnotho wayo.
Kodwa uthe iIMF izancedisa iZimbabwe kuphela ingahlawula izikwelede zayo njalo ingalungisisa ezombusazwe.
Kunjalo nje, inhloko kahulumende uMnu Morgan Tsvangirai uthakazelele ilanga lakhe lokuzalwa ngoLwesithathu. UMnu Tsvangirai ufikise iminyaka yokuzalwa engamatshumi amahlanu lasitshiyagalombili.
Iziphathamandla zeMDC ezimbalwa zibuthene endlini kaTsvangirai eHarare emkhosini wokuthakazelela leli langa. UMongameli Mugabe kaphathekanga ngoba enganxuswanga.
