Umgcinisihlalo weSADC Troika njalo enguMongameli weMozambique, uMnu Armando Guebuza ngoLwesine ubekhangelelwe ukwazisa abaphathintambo bamazwe asezansi yeAfrica ngokuthi inkulumo phakathi kweZanu PF leMDC sezikuliphi izinga.
Abaphathintambo laba bahlangene esigodlweni seMozambique iMaputo belungiselela umhlangano omkhulu wenhlananiso yomanyano wamazwe awezwekazi leAfrica, oweAfrican Union osungulwa kwele Ethiopia mhlaka 25 kuyonale inyanga. Umhlangano lo uzaphela mhlaka 2 ngoNhlolanja.
UMongameli Guebuza unikezwe ugwalo nguMongameli Jacob Zuma weSouth Africa kunsukwana ezedluleyo oluveza ukuthi inkulumo zokuzama ukulungisisa okuhluphayo kuhulumende weZimbabwe sezifike kuliphi ibanga.
Ingcwethi ecubungula ezombusazwe uMnu Brilliant Mhlanga utshele uNtungamili Nkomo weStudio 7 ukuthi kuqakatheka ukuthi iTroika yazise amazwe akuSadc ngokuthi inkulumo zeZimbabwe zihamba njani.
