Inhlanganiso ephathisa uhlelo lokulotshwa kutsha kwesisekelo sombuso eye United Nations Development Programme ithi ayiselamali yokuqhubeka iphathisa uhlelo lokulotshwa kutsha kwesisekelo sombuso.
IUNDP yazise ikhomidi yephalamende ebona ngokulotshwa kwesisekelo sombuso esitsha emhlanganweni owenziwe ngoMvulo. Umhlangano lo ungenwe njalo ngabameli benhlanganiso yeEuropean Union eZimbabwe.
IUNDP ixhwayise iCOPAC ukuthi icele uncedo lwemali yokuqedisa isisekelo sombuso kuhulumende womanyano. ICOPAC ithi kufuneka izigidi ezithoba minwe mbili zamadollar eMelika-US$8million yokuqedisa uhlelo lokuthapha imibono kazulu hatshi ukuqedisa uhlelo lonke lwesisekelo sombuso.
Ngemva kokwamukelwa kwemibono kazulu kuzabuthelelwa imibono evele ebantwini kwethulwe iDraft Document. Besekusenziwa ukhetho lweReferendum. Konke lokhu kuzafuna eyinye imali.
UBrenda moyo we Studio 7 ukhulume lomunye wabagcinisihlalo beCOPAC uMnumzana Edward Mkhosi othi esikhwameni seCOPAC kulemali engazange isetshenziswe, ngakhoke sebecele iUNDP ukuthi baqambule limali isetshenziswe ekuqediseni uhlelo lokuthapha imibono kakhulu.
Kunjalo nje icele leMDC elikhokhelwa nguMnumzana Morgan Tsvangirai lithi abasekeli beZANU PF sebesungule inkamba zama militia esabelweni seManicaland ngenjongo yokwethusela uzulu ukuthi engaphatheki kuhlelo lokulotshwa kwesisekelo sombuso esitsha. embikweni wayo ewethule namuhla iMDC yazise ukuthi inkamba lezi ziseNyanga south kuWard 16, ku Ward 19 laku Ward 15. Umsekeli wesikhulumi salelibandla uNkosazana Thabitha Khumalo uchasisele uNtungamili Nkomo okunengi.
Kodwa isikhulumeli seZANUPF uMnu Rugare Gumbo uyilandule imbiko yeMDC esithi inkamba ezikhona ngezinika abasekeli bebandla lakhe ulwazi ngodaba lwesisekelo sombuso, hatshi ukwethusela uzulu.
Kusenjalo inhlanganiso emela amalungelo abagogekileyo ithi ayiboni isisekelo sombuso esitsha esilotshwayo sizanakekela amalungelo abo kulandela indlela esetshenziswa ngabathapha imibono kazulu abahle babandlule abagogekileyo laba.
