Inhlanganiso yezisebenzi, iZimbabwe Congress of Trade Unions, ithi sekusobala ukuthi uhlelo lokulotshwa kutsha kwesisekelo sombuso lukhokhelwa ngabezombusazwe ngoba sekuthiwe abathathau abakhokhela amabandla akuhulumende yibo abazakhokhela loluhlelo.
Linhlanganiso, imanyene lenhlanganiso yezifundi, iZINASU kunye le NCA, zithi kazamukeli loluhlelo ngoba lukhokhelwa yikhomidi yedale lephalamende. NgolwesiThathu iZCTU ithi ithole imbiko ekhomba ukubana uMongameli Mugabe kunye lenkokheli yamacele eMDC womabili, uMnu. Morgan Tsvangirai loMnu. Arthur Mutambara yibo abazahluzisisa imbono kazulu andubana ifakwe kusisekelo sombuso esitsha.
Umsekeli kanobhala jikelele weZCTU, uMnu. Japhet Moyo uthi abakuphikisayo kakhulu bona njengenhlanganiso yikuthi amabandla amathathu kawagoqeli imbono yelizwe lonke.
Kunjalo nje, lanxa uhelo lokulotshwa kutsha kwesisekelo sombuso seluqalile akukabi sobala ukuthi imbono yezizalwane zeZimbabwe ezihlala kwamanye amazwe izathathwa njani. NgolweSibili iStudio 7 ixoxe lomunye wabagcinisihlalo bekhomidi ekhokhela loluhlelo, uMnumzana Edward Mkhosi othe akukacaci ukuthi loluhlelo luzathinta njani izizalwane zeZimbabwe ezingafika izigidi ezine esezihlala kumagumbi amane womhlaba.
Umkhokheli wenhlanganiso yezizalwane zeZimbabwe ezihlala emazweni, iGlobal Zimbabwe Forum, uMnumzana Daniel Molokele uthi sebeke bakhulumisana lohulumende ngaloludaba kodwa kacaci ukuthi uzafinyelela njani izizalwane zeZimbabwe ezikwamananye amazwe.
